in memoriam Marc Linster, un journaliste "grand format"

Commentaire:

Marc Linster, 6 Januar 2005 RTL Radio Lëtzebuerg

_________________________________

Et ass zimlech moer, wat der Madame Reding an dem Här Biltgen un Argumenter agefall ass, fir d'Openthaltsgeneemegung vun der philippinescher Haushälterin vun der Koppel Zois-Reding ze justifiéieren... Formalrechtlech gesi kann een dem Minister a senger Parteikollegin zwar näischt direkt virwäerfen, mä déi ganz Saach sténkt dach géint Himmel.

Et huet jo och zimlech laang gedauert, bis de Fränz Biltgen seng komplizéiert Äntwert fäerdeg hat... ëmmerhin hat de Feierkrop d'Nouvelle schonn am Dezember lancéiert.

D'Argumentatioun vum Minister an der Kommissärin hippt gläich op e puer Féiss: esou heescht et vu béide Säiten, d'Madame Reding hätt guer näischt mat de ganzen Démarchen ze dinn... et wier hire Mann, den Här Zois, dee sech em d'Saach bekëmmert hätt an hien hätt d'philippinesch Mod engagéiert. Formal gesinn ass dat méiglecherweis esou, mä ech ka mer dach net virstellen, dass et keng Kommunikatioun am Stot Zois-Reding gëtt. An ech huele jo staark un, dass d'Viviane Reding och vun hirer Haushälterin profitéiert, och wa se d'Woch iwwer zu Bréissel ass. Dës ganz Argumentatioun ass zimlech schwaach... ech explizéiere mech:

Wann ech en Installateur engagéiere fir eist Buedzëmmer ze renovéieren an déi Leit, déi mat mir am Stot wunnen och vun den Installatioune profitéieren, da kënne se wuel kaum behaapten, et wier mäi Buedzëmmer.

Mä och déi aner Explicatioun vun der Madame Reding an dem Här Biltgen iwwerzeegt mech net: do heescht et jo, de Mann vum Viviane Reding hätt keng Haushälterin um europäesche Marché fonnt. Dat kann dach net sinn: ech mengen, et huet just um gudde Wëlle gefeelt, well ech hunn ouni Problem en Internet-Site fonnt, wou Haushälterinnen hiren Déngscht offréieren: www.hauspersonalagentur.de Alleng op dem Site ginn et 408 Persounen, déi an Däitschland eng Plaz als Haushälterin sichen. Dobäi sinn der och, deenen et ganz egal ass, wou se wunnen a schaffen. Soll de Ménage Zois-Reding dat wierklech net gewosst hunn?

Och zu Lëtzebuerg ginn et Leit déi prett si géint Kascht a Logis - wéi den Här Biltgen dat nennt - ze schaffen. Ech denken do zum Beispill u Persounen, déi ganz an engem frieme Stot matwunne fir eeler oder krank Leit ze betreien.

Firwat muss et also grad déi philippinesch Mod sinn?