E puer Bemierkongen zum Débat iwer Schoulreform

Virspan :

Bei der Diskussioun ëm t'Schoulreform  gëtt et ëmmer méi schwéier erauszefannen ëm wat et deenen engen an deenen aneren eigentlech geet.

Ech ginn t'Gefill net lass, datt bei der Schoulreform  vläicht eng Etapp iwwersprongen gouf, an zwar e gemeinsamen Diagnostik vun der jëtzeger Situatioun ze man.

Wann ausser deenen déi ni an  näischt änneren wëllen, en breeden Accord zu Stan kéim fir erauszeschielen wou Handlungsbedarf ass, da kéim et zu  enger interessanter Diskussioun wat ze man wär. Do kéimen bestëmmt ënnerschiddlech Léisungsvirschléi op den Dësch, me - ech dreemen e beschen- eben Léisungsvirschléi, we weess souguer vläicht Konzepter, e Wellen géif sech kristalliséieren kennen fir duerch Pilotprojet'en sech no vir ze  taaschten.

Datt mer vill Schoulofgänger ouni Qualifikatioun hunn, gesäit net jiddereen, se sinn jo net méi do!

Datt mer eng Schoulbevölkerong hun déi bannent 30 Joer an groussem Moos geännert huet, ass gewosst an dat net nëmmen wat de Kanner a Jugendlechen hiren Pass ubelaangt, me och wat haut an hei sech am Ëmfeld an am Dagdeeglechen fir déi Jonk geännert huet.

Datt mer  eng 10 000 Schüler aus Lëtzebuerg hun, déi net an t'ëffentlech Schoul gin, an also dem Integratiounspotential vun eiser Schoul entwëschen, ass eng Réalitéit, och wann se kaum zur Kenntnis geholl gëtt.

Datt sech déi  austriedend Enseignantsgeneratioun an de 70er Joer Chancëgläichheet fir Aarbechterkanner op de Fändel geschriwwen hat, ass keen Thema méi.

Datt mer léiwer op den schéissen den  ons seet datt eis Schoul sech schwéier deet op sozial Ongläichheeten anzewierken, an dësem Fall déi béis OCDE, woubäi mier des Fro selwer genësserlech säit laangem  ausgeklamert haten.

Datt an der bestehender Schoul t'Enseignant'en reusséiert hun, liicht jidderengem an, dat kann dach awer net Ursaach genuch sin fir un där Schoul näischt ze änneren.

Datt mir souvill Zäit op Sproochen verwennen, an eis Schüler sech sou schwéier dunn an deenen Sproochen ze schwätzen, gett net thematiséiert.

Datt eis Jonk sozial segregéiert gin ab 12 Joer, hei déi aus besserem Milieu an de Classique, do déi aus méi schwaachem Milieu – op Lëtzebuerger oder Auslänner- an den Technique, stéiert manifestement keen. Ween vum tronc commun schwätzt, get wéi en Ausserierdeschen  behandelt : schliisslech sollen jo déi bestehend Eliten an dat bestehend Machtverhälnis net gekippt gin !

Datt et géif Sënn man an onser ëmmer méi heterogener  Gesellschaft jonk Leit bis soe mer 16 Joer zesummen an enger Schoul ze hunn, en Alter wou sech hier Perséinlechkeet erausschielt. Esou kéinten Relatiounen opgebaut ginniwwer sozial Grenzen eraus, dierft en dat net thematiséieren, oder ?

Ech entschëllegen mech villmools net an déi jëtzeg Diskussioun agegraff ze hunn, vläicht liewen ech an enger anerer Welt.

Ech wollt zum Schluss nach engem Expert t’Wuert ginn :

Zitat : « t’Jugend vun haut huet de Luxus gär, se huet schlecht Manéieren, se uergt keng Autoritéit, huet kee Respekt vrum Alter a braddelt amplaz ze schaffen.

Jonk Leit widderspriechen hiren Elteren, schwadrounéieren an der Gesellschaft, stierzen sech op den Dessert, leeën t’Been iwwerteneen an tyranniséieren hier Enseignant’en. » Enn vum Zitat.

Den Expert huet vrun 2 500 Joer gelieft an sein Numm ass Sokrates

RTL  Carte blanche 3 Februar 2012  serge kollwelter