Wahlen ouni Wieler?

Cb 4 mars 2013 Serge Kollwelter  Wahlen ouni Wieler ?

Virspan

Vru kuerzem war dervun riets t’Europawahlen nächst Joer Enn Mee ofzehalen. Schonns gouf kritiséiert dat géif an Päischtvakanz falen, ass wéi wann nach net gewosst wär datt et och Bréifwahl gëtt. Mee zu dem Termin mengt de Serge Kollwelter géif et vläicht nach eppes aneres ze vermellen.

Fréijoer 2014 ginn ech dann nees wielen, fir t’aachte Kéier säit 1979 kréien ech dann am Wahlbüro zwee Stëmmziedelen ausgehändegt. Wochen a Méint virdrun left eng Campagne fir t’Chamberwahlen. Dir wësst alleguer fir wat den 2. Stëmmziedel ass, hei geet et ëm t’Europawahlen. Hat en an deene Wochen a Méint virdrun  jeemools iwwer des Wahlen eppes héieren? Nu ass jo ze verstoen datt bei eis Chamberwahlen méi Platz anhuelen, t’Europaparlament weit ewech ass an net einfach ze suivéieren. Vläicht wësse mer och net richteg wat do leeft, woufir dëst Parlament zoustänneg ass. Loosse mer eis dat e beschen méi genau ukucken. 70 % vun de Gesetzer déi eis Chamber stëmmt kommen vun europäeschen Gesetzer, dat heescht si sin vum Europaparlament a vum Ministerrot vun der Unioun gestemmt ginn a mussen an nationaalt Gesetz ëmgesat gin : 70 %. Bleiwen oder also no Adam Riese 30% déi nëmmen matt eisen nationalen Begebenheeten zu dinn hunn. Wa mer lo drun denken wat eis an enger Wahlcampagne zougemutt gëtt a wouriwwer net oder sou gutt wéi net  geschwat gëtt, musse mer eis do net e beschen verschaukelt virkommen : Exklusiv iwwer déi 30 % vun dem wou eis Chamber ze befannen huet ze schätzen an näischt iwwer déi 70 % vum Europaparlament. Mir sollen sécher iwwer eis Parteien a Kandidaten fir t’Chamber diskutéieren, wënschenswäert souguer iwwer hier Programmer. Et kann dach awer net sinn datt t ‘Opmierksamkeet  fir Europa just dauert vun dem Moment wou mer den 2. Stëmmziedel an t’Hand gedreckt  kréien bis zu dem Moment wou mer en an t’Wahlurn werfen. Oder ?  Dann ass jo elo dervu Rieds europawäit t’Wahlen fir t’Europaparlament Enn Mee ze man. Tip top, da kënnte mer jo 2 getrennten Terminer erausschloen : Enn Mee fir Europa, an dem Gesetz no Ufanks Juni fir eis Chamber. Wat en Opwand fir innerhalb vun 2 oder 3 Wochen zweemol wielen ze goen. Firwat net déi 2 Terminer nach méi auserneen leeën  an 2 getrennten Wahlcampagnen maachen : eng fir déi 30% an eng fir déi 70%. Gett ze deier ! héieren ech schonns vun hei an do. Ass et eis ze deier ze wëssen wourëms et geet ? ze deier eis matt Europa ausernenzesetzen ? ze deier gewuer ze ginn wat eis fir 70% servéiert gëtt ?. Kee Gesetz ass néideg. T’Chamber léist sech selwer Ufanks 2014 op an da sin National Wahlen am Mäerz.  Wa mer eemol dee Rhythmus hunn muss e mer e bäibehalen well jo all 5 Joer frësch gewielt gëtt. Ech wetten matt iech datt dëst net geschitt : fir wat sollen eis Deputéierten dann hier Amtszäit emol ëm 3 Méint kierzen ? dach net wéinst  Europa ! Et ass dach sou schéin bedaueren ze kennen wéi schwiereg et ass iwwer Europa ze vermëttelen statt e richtegen, eegenen Wahlkampf iwwer Europa ze man !