"Demokratie an der Schoul"

Den Dag vun de Mënscherechter bréngt de Serge Kollwelter, vu Beruff Schoulmeeschter, derzou seng carte blanche vum 8. Dezember 2010 "Demokratie an der Schoul" ze iwwerschreiwen

Den 10. Dezember ass den Dag vun de Mënscherechter, e Pilier vun der Demokratie. Sécherlech ass de Stand vun de Mënscherechter zu Lëtzebuerg gudd am Vergläich mat munneche Länner op dëser Welt. Bleift t'Fro wéi mer dermat ömgin, wéi mer se versuergen a flegen. Natierlech spillt hei t'Schoul eng grouss Roll. Dobäi kennt et hei net esou drop un déi Texter ze kennen, och wann dat net vun Nodeel ass. Grad esou wéi et sënnvoll ass de Fonctionnement an t'Decisiounsmechanismen vun der demokratescher Gesellschaft ze kennen. Ech déit mengen et kéim virun allem drop un Erfahrongen matt Demokratie ze man, als Kand, als Jugendlechen an zwar an där gesellschaftlecher Struktur wou jiddereen derduerch muss, eben t'Schoul. Heizou gehe'eren Meenongsausenanersetzongen, Verhandelen, Kompromësser sichen. En etlech Gemenge probe'eren dat mat Kannergemengeréit. Wéi steet et dermat an eise Lycéeën? Wéi spiert e jonke Lycéesschüler sech eescht geholl an der Schoul, virun 18 Joer an duerno als vollwäerteg Bierger? Et geet natierlech net dröm de Schüler eppes virzeman, hinne virzegaukelen si sollen iwwer Programm oder Noten matbestëmmen. Wa si awer net an der Schoul als lescht gesellschaftlech Instanz wou se derduerch mussen, t'Erfahrong man datt se eescht geholl gin, hier Meenong zielt, se an en Decisounsmechanismus agebonnen sin, wéi a wéini dann? Dach net nemmen all 5 oder 6 Joer matt engem obligatoresche Walziedel. Demokratie ass dach méi wéi dat, oder iwwerloosse mer se de Berufspolitiker? Ons Riedensaart "seng Stëmm ofginn" , déi op dem Walziedel, heescht jo net 5 oder 6 Joer ofschalten, heescht jo net seng Stëmm net méi benotzen. Welleche Spillraum huet e Lycée an onsem Schoulsystem, welleche Budget? Wéi gëtt de Spillraum genotzt, wéi de Budget ëmgesat? Wéi ginn heibäi déijéineg déi Daseinsberechtegong vun der Schoul sinn, näämlech Schüler matt agebonnen. Et geet net duer 2 Schüler an engem Gremium ze hunn, firwat net t'Reunioune vun dem Conseil d'Educatioun iwwer Internet an all Klassesall iwwerdron? Dat wär Geleeënheet an all Klass lieweg Educatioun civique ze man. Zevill opwenneg? De Software kascht 200 Euro, an eng Webkamera nach emol 50. Zeitverloscht? Demokratie brauch Zeit, Net-Demokratie get méi schnell! Demokratesch Prozesser an engem iwwerschaubare Kader matmaen, analyséieren, déi Gewielten kontrolléieren, kritiséieren a proposéieren. Dat alles an engem Kader den vum Gesetzgeber geschaf gouf an den et gellt mat Liewen ze fëllen. Demokratie am Alldag oder all 5 oder 6 Joer emol? Demokratie an der Schoul: ouni Praxis eng Theorie niewt villen aneren! Déi rezent ICCS étude weist datt op desem Feld och am internationalen Vergleich zu Letzebuerg soliden Nachholbedarf besteet.

Serge Kollwelter